Us clubhoes
Programma
Bestuur
Lede Info
Rippertwaar
Foto gallereij
Op TV
In de gezt
Us reiske
Linke sop
Sjik us u mailke
Beigewèrrek 04-01-2011

't Is of iech 3 weke vekansie höb gehad; zoeväöl gelache, zoeväöl plezeer en belevenisse.

Höb geer ouch d'n hielen tied dat leedsje in eure kop? Es iech 't al neet zing, huur iech

Peter vaan achter ziene kompjoeter zinge: En mien linker bein, en mien rechter bein.......

Op de vriedag vaan vertrek had iech vrij genome, zoetot iech good oetgerös en op tied in

Parc la Clusure zow aonkoume. Tegeswoordig mèt de Tomtom is 't jummers gein probleem

um de weeg te vinde en veer waore daan ouch sjoen op tied, sjus naotot Hans en Ine mèt

Hanneke en Ellen waore gearriveerd. Ze waore sjus aon 't klatsjenere mèt de

kempingleiing um deveur te zörrige tot veer allemaol bijein op ein terein kóste stoon. De

wèls 't toch gein aander kampeerders aondoen um vlakbij us te stoon. Neet tot veer

kebaal make, mer ze kinne us dialek neet verstoon en noe kóste veer ouch alle steul

gebruke van de bungalows, die oonbewoend waore, zoetot de echte kampeerders oonder

us, die geine stool bij ziech hadde, ouch lekker kóste zitte.

De tente woorte opgezat; Hanny deeg dat gans in häör einsje. 't Moot trowwens 'ne hiele

toer zien gewees um zich daor liggend in um te kleije! Hanneke en Ellen deilde 'n tent en

kaajd höbbe zie 't neet gehad. Annie en Ed hadde vaan toes alle beddegood en matras

mètgenome en noe kós Ellen hun dekbed oet de bungalow liene. Iech zow trowwens häöre

maan Bert wel 'ns welle zien. Noets nump zie häöm mèt. Zow heer zoe sjoen zien tot zie

bang is häöm te verlere? De derde tent waor vaan Jos; heer waor vaan alle gemake

veurzeen; veur de tent stoont 'n ieskas; daor pasde 6 klein blikskes beer in en veur tot

die kaajd waore, had heer die al op of deilde ze oet. Heer had 'n rol bij zich mèt 50

mèter ellentrikke snoer um dat ieskeske aon te slete en u kebaal tot dat dink maakde!

Mèr 's nachts had heer 't wel lekker wèrrem vaan de hits die dat ieskeske aofgaof.

Wie veer allemaol friete en gehaksballe etc. etc. hadde gehaold in de kantien en us dat

heerlek hadde laote smake zoe same aon ein groete taofel, waor 't tied veur de officiële

opening vaan 't hikekamp. Veer woorte bij elkaar getrommeld en uzze veendel woort

gehese oonder 't zinge vaan 't Mestreechs volksleed mèt us hand op de boors. Helaas

koum uzze Prizzedent Sjoerd en Gerie pas laat op de aovend doed vermeujd aon.

Daornao woorte de lunsjpakkètte oetgedeild veur mörrege (alles in de pries inbegrepe).

Eindelik kós iech de kedokes goon oetdeile, dat had iech jummers mèt asselegoonsdag

neet gedoon. Miene Peter had nog get subsidie bij de Gemeinte kinne lospeutere (in 't

kader vaan de cultuur) en dus kós iech goon sjoppe o.a. bij de Bijjekörref. Wie ederein

dach tot heer 'n sjoen kedoke had gekrege en 't gaw in zien koffer wow lègke, höb iech

oetgelag tot veer via 'n speul de kedokes ginge ruile. Dat veel neet bij ederein in gooj

aerde. Veural Ed wow zien design beeldsje neet aofstoon en heet gelök gehad tot heer 't

ederskier kós trökruile. Nicole lökde 't ouch um de begeerde vastelaovendpooster trök

te kriege en Connie waor wat blij mèt de containerstickers. Helaas waor mer eine

leesbrèl debij, want hei waor hiel väöl intresse veur. Jessy had eindelik de peignoir boe

zie allang vaan druimde en Marjolijn, die gein lang brook bij ziech had, waor hiel blij mèt

de fleurige legging, die zie metein aontrok. De votebalsum dee Peter M kreeg, kaom later

good vaan pas, wie Peter in ruil veur 'n tas koffie de veuj vaan Ine en miech heerlek heet

gemasseerd.

Op zaoterdag woorte veer um 8 oor door trompötgesjal, boe de euverige kampeerders

neet blij mèt waore, door Hans gewèk.

Naotot veer hadde gedoesj ginge veer mèt z'n alle naor de kantien veur 'n

oontbijtbuffet. De koffie waor zoe sterrek tot veer noe ech allemaol wakker waore. D'r

woort good gegete, en dat moos ouch wel mèt die wandelinge vaan 2, 4 of 6 oor veur de

boeg. Veer krege weer stevige instructies: good insmere, pet op doen, op tekebete lètte

en väöl drinke. Op de foto's kint geer zien wat 'n prachtige umgeving dit is, boe veer zien

goon wandele. Nicole, Peter en Thijs ammeseerde ziech ouch mèt stein zeuke en in

beekskes goeje. zie sjreve mèt stekskes tekste op de groond, zoetot de 6 oor-groep de

weeg neet kwiet woort en iech waor blij tot ze miene wandelstek hadde gevoonde.

Um 5 oor waor ederein weer gezoond en wel trök op 't kampemint. Allein Gyan, dee op

zien winkbrowwe trök kaom, had ziene rök gesjendeleerd door neet good op te lètte.

Oondertösse laog de 2 oor-groep te bakke in de zon en naom 'ne frisse duuk in 't

zwumbad, allein Rob had de sjaduw opgezeuk. Annie had gein bakpak bij ziech (zie had 't

vekansiegeld nog neet binne) en moch dat vaan miech liene; 't waor allein u bitsje

oetgelebberd aon de bips.

Toen kaom 't groete werrek; Ine had alles oonder control; zie zag: hool eur eige metse en

snijplaanke en d'r woorte kilo's greunte gesnoje esof us leve devaanaof hong en dit

oonder genot vaan u gleeske wien en lekker neutsjes. Dat waor 'n sjoen geziech en

oondertösse waore Hans (mèt bloete boors), Peter M (in kokstenu) en Sjoerd (in

operatiesjollek) weurskes aon 't bakke op de sjottelbraaj. De hun Pico en Bello sjaarde

ziech af en tow u weurske weg en lete zich dat good smake, dus veer wiste zeker tot ze

lekker waore. Veer höbbe same heerlik gegete en gedroonke en toen waor 't tied um mèt

de herremenie de kemping roond te goon ... wat hadde veer u bekieks! Euveral boe veer

kaome woort gedans en gesproonge. Thijs leep veurop en Imke en Jelle droge um de

beurt uzze veendel. Veer höbbe nog noets zoe vals gespäöld (oondaanks uzze nuie

trommeleer Marc) en noe zeen iech nog miejer de noedzaak vaan us rippetities in. In de

kantien höbbe veer nog 'n concert gegeve. Dat lieverde gejoel, meh veural applaus op.

Daornao zoonge veer 'n hiel repertoir gezellige leedsjes en Richard mèt zien trompöt

begeleide us daorbij en heer ammeseerde ziech mèt 'n aontal sjoen meidskes die

verzeuknummers mochte vraoge. Later, trök op us kampplaots, zien veer mèt 'n aontal op

bezeuk gewees in de 4 persoons bungalow vaan Ed, Annie, Peter en Yvonne. Veer hadde

allemaol steul mètgenóme en wowwe iers stoeledans goon doen, mer wegens 't

zuurstofgebrek mèt zoeväöl lui in 'n te klein ruimte, waor dit neet slum, mer gezèllig waor 't

wel. De wandelinge woorte geëvalueerd en ederein had hepkes en drenkskes aongesleip.

D'r woort 'n bikinislip gevoonde en later bleek die vaan Marjolijn te zien; die same mèt

Twan al lekker op 'n oer laog. Zoondagmörrige spek mèt eier vaan us 3 koks. Jäömer tot

Rik en Petra zoe vreug mooste vertrekke naor Vallekeberreg. Zie lete 'n gans pakket

levensmiddele achter, dat veer us lekker höbbe laote smake. Zoeväöl hennekes zorrigde

deveur tot de kampplaots in 'n mum vaan tied waor opgeruimp. Ederein höllep mèt,

niemes oetgezundert en daor bin iech gruuts op zoene harmonieuze groep;

oongetwiefeld uniek in Mestreech. Daor kós de polletiek 'n veurbeeld aon neume.

En daor vertrok de karrevaan achter de camper aon naor de volgende bestumming, boe

veer get zowwe drinke en nog 'n sjoen wandeling same ginge make. Umtot de kaffee vol

zaot en 't begós te regene kóste veer neet boete zitte. Veer hadde permissie um in de

gooj privékamer te zitte. Veer mochte veur de "vrunteleke" Medam neet mèt de steulpu

euver de goond sjroevele. Now jeh, zie zaog us liever goon daan koume. Zie kós wel

heerleke Brusselse waffele bakke en lekkere kappesjino make. Eve later sjeen de zon

weer en zien veer goon wandele en höbbe genote vaan de natuur en de vergeziechte.

Wie veer weer trök bij die Medam kaome, kóste veer lekker boete in de zon zitte.

't wiekend zaot drop; de volgende kier nump Sjeng zien Marion zeker mèt.

Naotot veer Hans, Hanneke en Ine oetbundig hadde bedaank en hei en daor 'n träönsje

woort weggepink, ging eder ziens weegs. Richard, dee bij us in de oto zaot, laog al gauw

te pitte vaan al de vermeujenisse, en woort wakker vaan de stortbui, die de straote blaank

deeg stoon.

Wat höbbe veer gebóf mèt 't weer en mèt us allemaol; get um daankbaar veur te zien.

2 daog later höbbe veer 't lèste stekbroed same mèt Wouter naor de kinderboerderij

gebrach.

 

Es dit verhaol uuch aonsprik en es geer lid wèlt weure klik daan op "Sjik us u mailke".

 

M@ri@nne©